Siglir tar il cuntegn

Header

video
Maletgs d'archiv da Qassem Soleimani
Or da News-Clip dals 03.01.2020.
laschar ir
cuntegn

Attatga americana a Bagdad General iranais Soleimani vegn mazzà tar l'attatga

  • A l'eroport da la chapitala da l'Irac Bagdad hai dà in'attatga cun rachettas dals Stadis Unids. Almain set persunas èn vegnidas mazzadas.
  • Il ministeri da defensiun american ha confermà l'attatga.
  • Tar questa attatga è il general Qassem Soleimani vegnì mazzà.
  • La garda da revoluziun ha confermà la mort da Soleimani.

Il ministeri da defensiun american ha entant declerà ch'il president american Donald Trump haja dà il commando per l'attatga. Quella saja capitada sco «act da defensiun» per evitar ulteriuras attatgas da l'Iran sin il militar american en la regiun. Il general saja responsabel per la mort da tschients d'Americans ed alliads, uschia il Pentagon. Il general Soleimani valeva sco il pli impurtant represchentant dal militar iranais a l'exteriur. La tema d'ina guerra tranter ils Stadis Unids e l'Iran crescha.

Pentagon fa responsabel Iran per protests

Gia l'emna passada avevan ils Stadis Unids attatgà milissas schiiitas en l'Irac. Sco reacziun avevan tschients da demonstrants lura assaglì il mardi l'ambassada americana a Bagdad. Il militar american ha sinaquai mess en acziun helicopters da cumbat e transferì radund 100 schuldads en l'Irac. Il Pentagon fa responsabel l'Iran per ils protests.

Emprimas reacziuns

Il pli aut schef da l'Iran Ayatollah Ali Chamenei ha entant smanatschà als Stadis Unids cun ina greva vendetga. La via da Soleimani vegnia er manada vinavant era senza el, ha Chamenei scrit en ina brev da condolaziun ch'è vegnida citada en la televisiun statala da l'Iran.

Il minister da l'exteriur iranais ha plinavant clamà l'ambassadur svizzer a Teheran. La Svizra represchenta ils interess dals Stadis Unids en l'Iran.

RTR novitads 06:00

Artitgels legids il pli savens

Ir a sanester Ir a dretg