Siglir tar il cuntegn

Header

cuntegn

Exteriur Attatga Ansbach: Vendetga per mazzar muslims

L’attatga da suicidi d’Ansbach ha raschuns islamisticas. Quai resultia or d’in video da l’attentader chattà sin il telefonin, ha ditg il minister da l’interiur da la Baviera, Joachim Hermmann. Il fugitiv sa refereschia sin Abu Bakr al-Baghdadi, il manader da la milissa da terror Stadi Islamic.

En il video chattà sin il telefonin, haja il fugitiv sirian da 27 onns annunzià in act da vendetga cunter la Germania, perquai ch'il pajais mazzia muslims. Ils Tudestgs na vegnian betg pli a durmir en ruaus, haja l’attentader ditg en ses video, uschia il minister da l’interiur da la Baviera, Joachim Hermmann a la conferenza da medias. Il fugitiv sa refereschia en ses video er sin Abu Bakr al-Baghdadi, il manader da la milissa da terror Stadi Islamic.

15 blessads - quatter grevamain

L’attentader che viveva dapi dus onns en Germania aveva planisà da far in attentat sin in festival da musica cun 2’500 visitaders. L'um da 27 onns n’è dentant betg vegnì d’entrar sin l’areal, perquai ch’el n’avevan nagin bigliet. El purtava in satgados cun avunda material explosiv per mazzar pliras persunas.

Malgrà ch’el n’ha betg pudì entrar al festival, è el tuttina sa siglientà en l’aria avant l’areal. L’attentader è mort. 15 persunas èn vegnidas blessadas, quatter grevamain.

Il festival è silsuenter vegnì rut gieu. Ils 2’500 visitaders han bandunà l’areal. Il lieu da explosiun è vegnì serrà. Polizia, pumpiers e l’ambulanza èn stads a lieu curt suenter l’explosiun. La citad Ansbach ha bun 40’000 abitants e sa chatta radund 40 kilometers davent da Nürnberg.

Smanatscha d'expulsiun per attentader

Sco il pledader dal ministeri da l'intern a Berlin ha ditg, avess l’um da 27 onns gì da vegnir renvià a la Bulgaria. I haja dà ina smanatscha da trametter il Sirian puspè en la Bulgaria, nua ch’el era vegnì registrà sco emprim. Pertge ch'el sa chattava anc adina en Germania, n'ha il pledader betg pudì dir. Cler saja dentant che la dumonda d'asil dal Sirian saja bain vegnida refusada, ch’el vegniva però vinavant tolerà en Germania.

RR novitads 06:00+

Artitgels legids il pli savens