Attatga da bumba mortala ad Istanbul

En la metropola tirca Istanbul èn mortas almain 11 persunas tar in'attatga cun bumbas sin in auto da polizia. 36 ulteriuras persunas èn vegnidas blessadas, 3 da questas grevamain, quai communitgeschan las autoritads tircas.

lieu da la detunaziun d'ina bumba ad Istanbul, in bus da la polizia demolì, autos da pumpiers Bild in Lightbox öffnen.

Legenda da maletgs: Il lieu da la detunaziun, en il center da la citad veglia. Keystone

Tranter las unfrendas èn 7 policists e 4 civilists, ha ditg il guvernatur dad Istanbul Vasip Sahin. La detonaziun è capitada en il traffic da la damaun, entamez il district da la citad veglia Vezneciler, ch'è fitg popular tar ils turists.

Fin ussa n'è nagin sa declerads responsabel per l'attatga. L'ultim temp han rebels curds, represchentants da la milissa Stadi Islamic sco era sanesters radicals fatg attatgas en la Tirchia.

Il president tirc Recep Tayyip Erdogan ha condemnà l’attatga e rinforzà sias intenziuns en il cumbat cunter il terrorissem. La Tirchia vegnia a manar il cumbat fin la fin, ha ditg Erdogan.

Entant ha la polizia arrestà quatter persunas suspectadas, quai rapporta l'agentura da novitads Anadolu.

RR novitads 10:00/17:00