Siglir tar il cuntegn
Inhalt

Exteriur Attatga da Londra: Tschintg unfrendas

Da l'attentader probabel sa tractia d'in burgais britannic. Quai ha communitgà la primministra Theresa May. La polizia ha arrestà pliras persunas. Entant è il dumber da morts s'augmentà sin tschintg. In'ulteriura persuna è morta en l'ospital pervi da sias grevas blessuras.

  • Mark Rowley, schef da defensiun cunter terror discurra d'in act terroristic.
  • L'attatgader è identifitgà. Tenor la primministra sa tracti d'in burgais britannic.
  • Fin uss èn 5 persunas mortas da l'attatga. Tranter auter l'attentader sez.
  • Da las unfrendas sa tracti d'in polizist, 2 turists ed er l'attentader.
  • Almain 40 persunas èn vegnidas blessadas. 29 èn anc en l'ospital.
  • Svizzers n'èn betg tranter las unfrendas.
  • 8 persunas èn vegnidas arrestadas.
  • La milissa da terror Stadi Islamic ha proclamà d'esser responsabla annunzia Amak in dals portavuschs dal SI

Stadi Islamic responsabel per attatga

La milissa da terror Stadi Islamic è sa mussada responsabla. In schuldà dal Stadi Islamic saja stà responsabel, scriva l'agentura da propaganda dal SI Amak. Verifitgà na po l'indicaziun il mument betg. Las indicaziuns èn dentant vegnidas fatgas sur ils meds usitads dal Stadi Islamic, scrivan las agenturas da novitads.

L'attentader era in um britannic

Las autoritads britannicas discurran d'in act terroristic islamistic ch'ina persuna singula haja commess. L'identitad da l'attentader è entant enconuschenta. Da l'attentader probabel sa tractia dad in um oriund da la Gronda Britannia. Quel saja stà enconuschent al servetsch secret MI5 ch'haja investigà cunter l'um avant intgins onns en connex cun extremissem violent. Quai ha communitgà la primministra Theresa May.

Emprimas arrestaziuns

En connex cun las investigaziuns en chaussa ha la polizia arrestà fin qua otg persunas. Sco quai ch'il schef da defensiun cunter terror da Scotland Yard ha ditg, sajan las persunas vegnidas arrestadas en sis lieus differents. Tranter auter sajan persunas vegnidas arrestadas en las citads da Londra e da Birmingham.

Tschintg unfrendas

L'attentader ha mazzà in policist e trais turists. L'um era l'emprim charrà cun in auto en persunas sin la punt da Westminster sper il parlament britannic. Suenter ha el attatgà in policist cun in cuntè. Il policist è mort da sias grevas blessuras. La finala han auters policists sajettà giu l'attentader.

L'attentat a Londra è vegnì commess exact in onn suenter ils attentats terroristics a Brüssel. Sch'i dat in connex tranter las duas attatgas n'è betg cler.

Reacziuns da la regenza

La primministra britannica Theresa May ha condemnà l'attentat sco act malsaun e degenerà. Mintg'emprova da disfar cun terror las valurs da la Gronda Britannia vegnian a far naufragi. L'attentader n'haja betg tschernì casualmain il parlament sco lieu per l'attentat. Il parlament stettia per libertad, democrazia e legalitad. Il parlamentaris vegnian perquai era a cuntinuar gievgia cun lur lavur.

Er la regina da la Gronda Britannia, Queen Elizabeth II, ha condemnà l'attatga terroristica e sincerà sia condolientscha per las unfrendas e lur famiglias.

RR novitads 06:00++