Siglir tar il cuntegn
Inhalt

Exteriur Attatga en tren regiunal - Stadi islamic surpiglia responsabladad

En in tren regiunal a Würzburg en la Baviera (D) ha in giuvenil attatgà pliras persunas cun cuntels ed ina sigir. Quatter persunas èn grevamain blessadas. Tenor l'agentura da novitads Amak che stat datiers a la gruppa da terror Sadi islamic, surpiglia quella la responsabladad per l'attatga.

Policists a la tschertga da cumprovas, autos da polizia davantvart.
Legenda: La polizia tschertga cumprovas da l'attatga en il conturn dals binaris. Keystone

Duas persunas sa chattan en privel da vita. L'attatgader era in Afgan da 17 onns. Tenor las emprimas enconuschientschas saja il giuvenil vegnì sco fugitiv minoren betg accumpagnà en la Germania.

Suenter in'emprova da fugia ha el attatgà ina truppa da la polizia ch'era vegnida natiers d'ina autra operaziun. Sin quai ha la polizia sajettà giu el. La polizia parta dal fatg ch'il giuven haja agì sulet.

Chattà bandiera dal Stadi islamic

Tenor il minister da l'intern da la Baviera, Joachim Hermann, saja vegnì chattà en la chombra dal giuvenil ina bendiera dal Stadi islamic, malegiada a maun.

Responsabladad dal Stadi islamic betg confermada

Sco l'agentura da novitads Amak che stad datiers da l'organisaziun terroristica scriva en l'internet, haja il giuven reagì sin appels d'attatgar las terras da la coaliziun internaziunala che cumbattia il Stadi islamic.

A moda sumeglianta aveva la gruppa terroristica surpiglià la responsabladad per l'attatga da venderdi a Nizza. Ina declaraziun ufficiala da l'organisaziun n'han ins dentant betg chattà. I n'è però betg cler sch'il Stadi islamic vul en omadus cas be profitar dad auters e dar ora quests attentats sco agens.

RR novitads 06:00