Siglir tar il cuntegn

Exteriur Attatga Hamburg: delinquent era enconuschent sco islamist

Tar l’attatgà ha l’attentader mazzà il venderdi en in center da cumpra ina persunas e blessà quatter ulteriuras. Quai communitgescha la polizia.

Tschintg polizists en mondura da schurmetg tschertgan fastizs.
Legenda: La polizia tschertga fastizs avant il center da cumpra. Keystone

Bain haja la polizia constatà segns d'ina radicalisaziun, i na saja dentant betg stà da spetgar che l’um saja curt avant far insatge privlus. Quai ha ditg il minister da l'intern da la citad da Hamburg. La polizia ha avis sin motivs religius. Ella ha dentant era observà che l'um è psichicamain labil. Il cuntè che l’attatgader ha duvrà, è ord il center da cumpra nua che l’um ha fatg l’attatga.

Suenter l'attatga era il delinquent fugì. Perditgas han dentant alarmà la polizia uschia che quella ha pudì arrestar el.

Perquisiziun en center per requirents d'asil

Suenter l'attatga cun in cuntè a Hamburg ha la polizia perquirì in center per requirents d’asil. Sch’ella ha chattà insatge, n’ha la polizia betg communitgà. L’attatgader probabel haja vivì en quest center.

Motiv anc betg cler

Tar l'attentader sa tracti tenor la polizia da Hamburg d'in um da 26 onns che saja naschì en ils Emirads Arabs Unids. Sche sia attatga ch'ha custà la vita d'in um da 50 onns e blessà ulteriuras quatter persunas haja in motiv terroristic na saja fin ussa anc betg cler.

RR novitads 20:00++