Tenor il primminister tirc Binali Yildirim han ils attentaders cumenzà a sajettar en la halla dal terminal. Pli tard hajan els lura siglientà sasez en l’aria. Davart l’identitad e l’origin dals attentaders na datti anc naginas indicaziuns uffizialas.
Attentaders èn nunenconuschents
Tenor Yildirim pudessan ils attentaders far part a la milissa da terror Stadi islamic. Las unfrendas vegnian per gronda part da la Tirchia ma era dal exteriur. Ellas na sajan dentant anc betg identifitgadas. Sco il Departament federal d'affars exteriurs (EDA) ha confermà, na sajan nagins Svizzers tranter las unfrendas.
La plazza aviatica d’Atatürk è la pli gronda plazza aviatica da la Tirchia e vala era sco ina da las pli segiras plazzas aviaticas dal pajais. Pir avant trais emnas eran 11 persunas mortas tar in'attatga en il center d’Istanbul. Per quella era la gruppaziun scumandada curda PKK sa mussada responsabla. Quest onn èsi gia la terza gronda attatga da terror ad Istanbul. Il president tirc Recep Tayip Erdogan ha appellà surtut als pajais dal vest d'agir cun persvasiun cunter il terror.
Traffic aviatic cun retards - Swiss stritga ses sgols
Ils emprims sgols da la Turkish Airlines èn atterrads mesemna bun’ura. Tenor l'emettur da televisiun CNN Türk pon ils passagiers er puspè entrar en ils terminals. Il traffic aviatic resta però restrenschi, plirs sgols han stuì vegnir stritgads. Gia la notg aveva il primminister Yildirim visità la plazza aviatica Atatürk e declerà ch’ella saja averta per tut ils sgols. La societad aviatica Swiss ha però stritgà tut ses sgols.
Johann Schneider-Ammann è consternà
il president da la Confederaziun Johann Schneider-Ammann è sa mussà consternà pervi da las attatgas terroristicas sin l'eroport d'Istanbul. La Svizra saja en cordoli per las unfrendas, ha Schneider-Ammann scrit en ina brev.
RR novitads 06:00+
RR actualitad mezdi