Siglir tar il cuntegn

Header

Navigaziun

Bastiment che brischa.
Legenda: In bastiment dad ieli en flommas en il Golf d'Oman. Keystone
cuntegn

Attatgas sin petrolieras Iran refusescha reproschas

Ils Stadis Unids fan responsabel l'Iran per las attatgas. Il minister da l'exteriur american, Mike Pompeo aveva ditg ch'ins saja vegnì a questa conclusiun suenter avair fatg in'analisa da las armas duvradas – quai dentant senza preschentar mussaments. Er in video publitgà en l'internet na porscha betg propi clerezza. Entant han ils Stadis Unids rinforzà lur preschientscha militara en la regiun.

La firma giapunaisa che maina in dals bastiments discurra dad in'attatga. Commembers da l’equipa hajan vis dus objects che sajan sgulads natiers. Ch’i saja stà ina attatga d’in torped sclauda il president da la firma però.

Appel al dialog

Il cussegl da segirezza da l'ONU vul spetgar in'exminaziun avant che s'exprimer. Ier en damaun eran dus bastiments, in da la Germania ed in da la Norvegia vegnids attatgads.

Er la China appellescha a las partidas da conflict da betg laschar escalar la situaziun. Nagin na veglia ina guerra en la Regiun dal Golf, uschia in pledader da la regenza a Peking.

Pretsch d'ieli s'augmenta

La stretga da la mar pertutgada, la Via da Hormus, è in dals passagis ils pli impurtants insumma. El collia numnadamain la Regiun dal Golf cun la mer averta. Ina gronda part dal transport dad ieli global maina tras quest passagi. En consequenza da las attatgas sin las duas petrolieras èn ils pretschs dad ieli s'augmentads marcantamain.

RR novitads 06:00