Siglir tar il cuntegn

Exteriur Attentader da Nizza n’ha betg agì sulet

84 persunas ha el mazzà cun ses camiun. In’emna suenter l’attatga, vegn adina dapli enconuschent da l’attentader. El haja gì cumplizis, di la procura publica da la Frantscha. Ed el haja planisà l’attatga durant plirs mais.

La polizia ha mazzà l’attentader Mohamed Lahouaiej Bouhlel en ses camiun.
Legenda: La polizia ha mazzà l’attentader Mohamed Lahouaiej Bouhlel en ses camiun. Keystone

L’attentader da Nizza ha gì agid tar la preparaziun da l’attatga avant in’emna. Quai èn las pli novas scuvertas da las inquisiziuns. En pli para il Tunesian da 31 onns d’avair planisà l’attatga durant plirs mais, sco quai ch’il procuratur public d’anti-terrur, François Molins ha ditg la gievgia saira a Paris. Fin ussa avevan ils investigaders be discurrì, che Mohamed Lahouaiej Bouhlel haja gì planisà l’attatga durant plirs dis.

5 suspectads

La procura publica ha avert ina procedura d’inquisiziun cunter 5 suspectads. Ad els renfatscha ella tranter auter d’esser commembers d’ina gruppa terroristica. Els duain avair gidà al manischunz dal camiun Mohamed Lahouaiej Bouhlel.

Gia dapi il 2015

Cun analisar las datas dl telefon, las fotografias sco era la cronologia da retschertgas en l’internet che Bouhlel haja fatg, vesian ins ch’il Tunesian haja probabel gia planisà l’attatga il 2015, uschia il procuratur public.

Tar l’attatga sin la Promenade des Anglais a Nizza èn 84 persunas mortas, passa 300 èn vegnidas blessadas.