L'impurtant en furma concisa:
- Rapiment d’ostagis en la chapitala dal Bangladesch Dhaka tras terrorists dal SI.
- Tenor pledader militar èn morts almain 20 ostagis e 2 policists.
- 9 da las 20 unfrendas èn Talians, 1 burgais talian è anc sparì.
- 6 rapinaders d’ostagis èn vegnids mazzads da la polizia durant l’attatga.
- In rapinader è vegnì arrestà tenor indicaziuns da la regenza.
- Totalmain 13 ostagis èn vegnids salvads.
Il rapinament e sia fin
La saira vers las 21:00 temp local han persunas armadas attatgà l'ustaria «Holey Artisan Bakery» en il quartier da diplomats e prendì dapli che 30 persunas sco ostagis.
Radund 12 uras pli tard ha la polizia assaglì l'ustaria cun in commando da passa 100 umens. 20 civilists èn vegnids per la vita - tenor il pledader militar saja la gronda part dad els gia vegnida mazzada durant la notg tras ils terrorists. Tut ils 20 morts èn persunas da l'exteriur, en emprima lingia Talians e Giapunais. Da vart da las autoritads èn morts 2 policists. 13 ostagis liberads sajan vegnids transportads en l'ospital, l'ustaria saja segirada e la situaziun sut controlla.
Il Departament federal d'affars exteriurs na sa il mument nagut d'unfrendas svizras.
SI ha sa declerada responsabla per il rapinament
La primministra dal Bangladesch Sheikh Hasina discurra d’in act da terror. Ella na numna dentant nagins nums d’organisaziuns cun quai che la regenza snega che la milissa terroristica Stadi Islamic SI u la Al-Kaida saja activa a Bangladesch.
Nus na vegnin a tolerar nagin act da terrorissem en il Bangladesch.
Tenor il post d'observaziun american Site haja dentant la SI sa declerada responsabla per il rapinament d'ostagis e quai schizunt curt avant che la primministra ha fatg ses discurs.
Site sa referscha sin rapports da l’agentura da novitads «Amaq» ch’è datiers dal SI. Plinavant ha Site publitgà via Twitter in placat dals «Sons Caliphate Army» ch’èn medemamain datiers dal SI. Quest placat sa referescha sin l’attentat.
Contractivas èn stadas senza success
Durant l’acziun da salvament cun dapli che 100 policists ha quai dà intensivas sajettadas. Plinavant eran d’udir explosiuns. In rapinader d’ostagis è tenor la regenza vegnì arrestà.
Forzas spezialas da polizia e militar avevan avant bloccà il territori enturn l’ustaria en il quartier diplomatic da Dhaka e sajettà cun chanuns. Tuttas stentas da contractar cun ils rapinaders sajan stadas senza success, uschia las autoritads.
RR novitads 08:00 / 10:00