Siglir tar il cuntegn

Header

cuntegn

Exteriur Attentat ad Istanbul - regenza fa responsabel «Stadi islamic»

Dad in'attatga da suicidi amez la citad èn mortas 4 persunas. 36 èn vegnidas blessadas. Responsabla saja l'organisaziun terroristica «Stadi islamic»

Ina survista da la zona da peduns cun ambulanzas e polizia.
Legenda: Alarm amez la zona da peduns - sonda bun'ura ad Istanbul. Keystone

En il center da la metropola tirca Istanbul ha quai dà in attentat da suicidi en la via da cumpra Istiklal. Tenor indicaziuns uffizialas sa tracti da l'attentader d'in commember da l'organisaziun terroristica «Stadi islamic». Fin uss n'ha l'organisaziun però betg surpiglià la responsablada.

Il minister da sandà ha confermà ch'i haja dà 4 morts. 36 persunas sajan blessadas, 7 dad ellas grevamain. Da quai sajan 24 stads turists da l'exteriur. Svizzers na sajan betg stads tranter las unfrendas, ha confermà il Departament federal d'affars exteriurs

Attentader para dad esser vegnì disturbà

In video, che duai derivar dad ina camera da surveglianza dal lieu da l’attentat, mussa in’explosiun amez intgins passants. Tenor in collavuratur da la regenza haja l’attentader gì in autra mira. Ch’el saja dentant vegnì disturbà da la polizia ed haja envidà la bumba en panica.

In dals blessads vegn salvà da las forzas dad emergenza.
Legenda: Istanbul - in attentader sa mazza amez il peduns e causa 5 morts e 36 blessads. Keystone

En vischinanza sa chatta in center da cumpra. La gievgia ed il venderdi aveva la Germania serrà ses consulat general ad Istanbul, l'ambassada ad Ankara ed ulteriurs lieus tudestgs pervi dad smanatschas dad in attentat.

Pir la dumengia passada eran 37 persunas vegnidas mazzadas tar in'attatga cun bumbas ad Ankara.

RR novitads 10:00+

Artitgels legids il pli savens