Siglir tar il cuntegn

Header

cuntegn

Exteriur Attentat en l’Iran – 29 morts e 57 blessads

Tar l’attentat sin ina parada militara en il sidvest dal pajais sajan mortas silmain 29 persunas e 57 sajan vegnidas blessadas. Quai rapportan differentas agenturas da novitads sa referind ad ina communicaziun uffiziala.

Quatter attentaders nunenconuschents haja cumenzà da sajettar durant la parada ad Ahwas en il public e suenter sin la tribuna dals visitaders uffizials, rapporta l’agentura da novitads mez-statala Isna. Dus dals tregants sajan vegnids mazzads da las forzas da segirezza. Tranter ils morts sajan dunnas, uffants, schuldads e schurnalists, rapporta l’agentura Reuters.

In dals attentats pli grevs cunter la truppa d’elita Iranaisa

Il minister da l’exteriur OIransai Mohammed Dschawad Sarif ha fatg responsabel en in tweet ad «aderents locals dal terror e lur patruns americans» – quai saja la furmla usitada da las autoritads iranaisas per descriver lur inimis principals da l’Arabia-Saudita ed Israel, scriva Reuters.

En la televisiun statala èn vegnids fatgs responsabels extremists sunnits. En il decurs dal di haja lura annunzià ina gruppa da separatists sunnits dad esser responsabla per l'attentat, scriva l'agentura da novitads SDA. La gruppa stettia strusch a la milissa sunnita da terror IS – in dals inimis mortals da l'Iran. En l'Iran è la maioritad religiusa schiita.

En divers lieus en l’Iran vegn commemorada ils 22 da settember l’entschatta da la guerra cun l’Irac (1980-1988) cun paradas militaras. La citad d’Ahvaz è en la regiun da Khouzestan, ina da las regiuns las pli fermamain pertutgadas tras la guerra cunter l’Irac.

RR novitads 10:00

Artitgels legids il pli savens