Siglir tar il cuntegn
Inhalt

Exteriur «Attenziun da la muntogna da rument!»

La situaziun vegn pli e pli dramatica: Uschia fetschia la Banca mundiala a Washington quint, che la muntogna da rument creschia senza cuntramesiras fin il 2050 per 70%. Quai rapportan differentas agenturas.

In uffant mussa ses mauns malnets.
Legenda: In uffant palestinais en il rument en la West Bank – millieras da persunas enturn il mund svutran las muntognas da rument sin material duvrabel. Keystone

Actualmain producescha il mund 2,01 milliardas tonnas rument ad onn. Cun quai ch’i dat adina dapli glieud ed adina dapli citads vegnan quels a producir l’onn 2050 3,4 milliardas tonnas rument. Quai scriva la Banca mundiala en ses rapport «What a Waste 2.0».

Investir cunter il rument renda

Perquai dat la Banca mundiala in cussegl economic: I rendia dad investir en sistems da reciclar e da gestiun da rument. La Banca mundiala sezza haja sustegnì dapi l’onn 2000 gia pli che 300 projects da reciclar sin tut il mund – e quai cun 4,7 milliardas dollars.

16% da la populaziun mundiala fan 1/3 dal rument

Passa in terz dal rument vegnia causà da quels 16% da la populaziun mundiala che vivan en ils pajais pli industrialisads. Pajais cun pajas autas cuntanschian percunter quotas da reciclar da 30%, fertant ch’ils uschenumnads pajais da svilup arrivian be tar ina quota da 4%.

Muntogna da plastic la pli privlusa

Il rapport da la Banca mundiala vegn a la conclusiun ch’ils pli gronds problems vegnan causads da la muntogna da plastic.

Sch’el (il plastic) na vegn betg ramassà e gestì endretg, vegn el a contaminar e donnegiar las auas ed ils sistems ecologics per tschientaners, sche na betg per millennis.
Autur: Banca mundialastudi «What a waste 2.0»

Concerns cunter plastic

Sustegn pratic en il cumbat cunter il plastic en l’ambient vegn er da plirs concerns internaziunals. La ministra d’ambient canadaisa Catherine McKenna ha annunzià ch’ils concerns Unilever, Ikea Canada, Loblaws, Coca-Cola, Volvo, A&W Canada, BASF Canada, Nestle Canada, Walmart e Dow Chemical sajan s'obligads da producir damain rument da plastic. Fin il 2040 duain tut ils emballadis esser reciclabels.

Il confess dals concerns sa basia sin ina charta suttascritta il zercladur da quest onn tar in inscunter dals G7 en il Canada, scriva l’agentura da novitads AFP.

Canada presidiescha quest onn la gruppa informala da las 7 naziuns pli pussantas – da la Frantscha, la Germania, la Gronda Britannia, l’Italia, il Giapun, il Canada ed ils Stadis Unids.

RR novitads 10:00