Be paucas uras avant ch’il campiunadi mundial da ballape da las dunnas cumenza en la Nova Zelanda ha in um sajettà enturn ad Auckland e mazzà almain duas persunas. Era l’um sez è mort, ha rapportà la polizia. Ulteriuras persunas sajan vegnidas blessadas.
Succedì è tut la damaun baud en in center da cumpra ad Auckland. Betg lunsch davent da la basa dals fans dal campiunadi mundial da ballape ed era betg lunsch davent da l’hotel nua che las giugadras da la Norvegia abiteschan che dattan oz l’emprim gieu cunter la Nova Zelanda. Tenor la polizia era il delinquent suenter avair sajettà enturn sa barricadà en in vau d'in ascensur. Suenter che la polizia ha empruvà da discurrer cun el, haja el sajettà vinavant e curt suenter ha la polizia chattà el mort. Il primminister da la Nova Zelanda, Chris Hipkins, ha ditg ch'i dettia nagina ristga da segirtad naziunala e ch'il campiunadi mundial entschaivia sco planisà.
