En l'Australia na sa tegnan sco ch'i para bleras persunas ch'han il coronavirus betg vi da las prescripziuns da sanadad da las autoritads e van vinavant tranter la glieud. En il stadi da Victoria, il hot-spot da corona, è quai mintga quarta persuna.
Cura ch'inspecturs da sanadad han examinà ils ultims dus dis las chasas da passa 500 persunas na sajan 130 dad ellas betg stadas a chasa. Tranter auter sajan quellas idas a lavurar. Quai ha ditg il primminister dal stadi en il sid-ost da l'Australia.
Per amur da Dieu, sche vus avais il virus, lura stuais vus restar a chasa.
Cunter var 100 persunas en la citad da Melbourne vegn investigà pervia da betg avair resguardà las reglas dal lockdown. La polizia ha gia scumpartì 124 chastis en l'autezza da 1'300 dollars australians. En il stadi da Victoria èn entaifer da 24 uras vegnì registrà 627 novs cas da corona. Quai è la segund'auta cifra, il di avant hai dà 723 novas infecziuns.