Siglir tar il cuntegn

Exteriur Australia: Conservativs gudognan elecziuns

8 dis suenter l'elecziun dal parlament en l'Australia èn ils victurs enconuschent. Cun ina pitschna maioritad ha la coaliziun da la regenza conservativa gudagnà l'elecziun.

Politicher australian.
Legenda: Il primminister Malcolm Turnbull sa declera sco victur da las elecziuns. Keystone

Il manader da l'opposiziun, Bill Shorten, ha gratulà al primminister Malcolm Turnbull tar ses pled avant adherents a Melbourne. El spetgia ch'il primminister vegnia a furmar ina nova regenza.

Il resultat definitiv da las elecziuns parlamentaras n'è però anc adina betg enconuschent. Suenter las prognosas da la cumissiun electorala dastga la coaliziun da la regenza conservativa quintar cun 76 u 77 sezs. Quai fiss avunda per cuntanscher la maioritad absoluta en il parlament cun 150 sezs.

L'opposiziun vegn probabel sin 69 sezs. Ils ulteriurs van a partidas pitschnas. En il vegl parlament avevan ils conservativs anc 90 sezs, l'opposiziun 55.

L'elecziun parlamentara è gia stada ils 2 da fanadur 2016. Pervi da la stretga differenza ha la dumbraziun da las vuschs però durà pli ditg ch'usità.

RR novitads 08:00