Siglir tar il cuntegn

Header

fieu en guaud.
Legenda: Millis turists ed abitants bandunan parts dal stadi Victoria en l'Australia. Là crescha il privel da fieu vinavant. Keystone
cuntegn

Australia Cunter flommas e cunter fieu artifizial da Son Silvester

En l’Australia fugian millis turists ed indigens dals incendis da chagliom en il stadi Victoria. Il responsabel da l’autoritad per la protecziun en cas da catastrofas ha ditg che pervi da las temperaturas sur 40 grads, il vent ferm e urizis saja il glindesdi ina sfida per ils servetschs da salvament. Uschia creschia il privel da fieu.

En tut avevan las autoritads appellà la dumengia a var 30’000 abitants e turists da bandunar ina regiun ch’è circa 280 km en il vest da la citad da Melbourne pervi dal privel d’ulteriurs incendis da chagliom.

270'000 cunter fieu artifizial a Sydney

Politichers e tschient millis abitants da l'Australia insistan da dir giu il fieu artifizial durant la notg da Son Silvester a Sydney. Enfin glindesdi marvegn han passa 270'000 persunas suttascrit ina petiziun online correspundenta. La chapitala Canberra sco er ulteriuras citads pli pitschnas han gia ditg giu ils fieus artifizials pervi dal privel da fieu.

Fieu artifizial a Sydney.
Legenda: Son Silvester a Sydney La show cun pirotecnica attira mintg'onn passa in milliun visitaders e visitadras al port da Sydney. La regenza e la citad èn s'exprimids da vulair far il fieu artifizial, sche las autoritads èn er da l'avis ch'i saja segir. Keystone

Incendis da chagliom dapi il settember

Dapi il settember furieschan incendis da chagliom en tschintg stadis australians. Passa quatter hectaras funs èn gia vegnidas destruidas. Nov persunas han pers la vita en las flommas.

RTR novitads 12:00+

Artitgels legids il pli savens

Ir a sanester Ir a dretg