Ils ultims onns hai dà blera plievgia en l'Australia ed uschia ina massa pavel. Uschia han ils kengurus pudì sa multiplitgar en massa. Creà las bunas cundiziuns ha il fenomen da l’aura «La Nina» ch’ha purtà blera precipitaziun a «Down Under».
Suenter trais onns La Nina a la costa orientala avain nus il scenari perfetg per ch’ils kengurus possian sa multiplitgar ils onns che vegnan.
Pervi da las periodas da sitgira a l’entschatta dals onns 2000 saja la populaziun da kengurus crudada sut 30 milliuns, di King. Dapi lura saja il dumber puspè creschì e possia bainbaud surpassar 60 milliuns. Sche la populaziun crescha dentant senza impediment na dettia betg pli avunda nutriment e milliuns kengurus pudessan murir da la fom durant la proxima sitgira.
Prognosas fatalas
Sche la situaziun dal pavel sa pegiurescha puspè suenter ils onns fritgaivels possia quai avair consequenzas fatalas per ils bursalins. «Els mangian il palpiri da tualetta da las tualettas publicas e giaschan enturn per las vias vi da crappar da la fom» raquinta Katerine Moseby or d'atgna experientscha. Durant l’ultima sitgira sajan crappads en tschertas regiuns, tenor stimaziuns, 80 fin 90% dals kengurus.
La meglra via per salvar ils kengurus da quest destin saja da chatschar ina part da quels per duvrar la charn ed il tgirom, è la protectura da l’ambient Moseby persvadida. Ella pleda per guardar ils animals sco resursa.
Quai tegn il dumber da kengurus bass, uschia che nus na survegnin betg problems sch’i dat ina setgira.
L'animal sco resursa
Kengurus èn bain protegids en l’Australia, ma las spezias las pli derasadas n’èn betg periclitadas da svanir. Cun ina lubientscha dastgan els vegnir chatschads en la gronda part dal pajais. Mintga onn vegnan fin a tschintg milliuns kengurus mazzads per il commerzi.
Organisaziuns da protecziun d’animals condemnan il mazzament commerzial. I saja ina «mazzacra crudaivla». Ellas fan squitsch sin ils gronds producents d’artitgels da sport sco Nike e Puma per che quels na dovrian betg tgirom da kenguru. Sco ina pledadra ha ditg il mars haja Nike sa separà l’onn 2021 da ses unic furnitur da tgirom da kenguru e na vegn betg a producir products cun tgirom da kenguru pli l’onn 2023.
Adattà al tema: SRF ha rapportà avant dus onns dal commerzi cun kengurus.
Campagnas cunter l’industria da kenguru
En il stadi federal american Oregon, nua che Nike è vegnì fundà, è vegnì inoltrà in sboz da lescha che duai scumandar il diever da «mintga part da kengurus morts». L’organisaziun Animals Australia ha crititgà l’entschatta da quest onn ch’ils animals vegnian mazzads per il profit commerzial.
Talas campagnas cunter l’industria da kenguru sajan da buna intenziun, ma na mainian betg a la finamira, avertescha George Wilson, in dals experts principals per populaziuns da kengurus.
Els din ch’i na saja betg etic da mazzar ils animals. Ma nunetic èsi da laschar murir els da la fom. I fiss crudaivel da far nagut cunter quai.
Quai è er l’opiniun da Katherine Moseby. Ella di ch’i na megliereschia betg il bainstar dals kengurus sch’ins na mazzia betg pli els per il tgirom e la charn. Quai vegnia be a pegiurar la chaussa.
Or da l'archiv:
