Siglir tar il cuntegn

Header

cuntegn

Exteriur Austria e Germania avran lur cunfins

L'Austria e la Germania avran lur cunfins per fugitivs ch'èn bloccads en l'Ungaria. Quai ha communitgà il chancelier austriac Werner Faymann. La decisiun saja crudada sin fundament da la situaziun urgenta als cunfins en l'Ungaria e saja coordinada cun la chanceliera tudestga Angela Merkel.

Werner Faymann aveva telefonà cun il primminister ungarais Viktor Orban. La regenza da l'Ungaria ha mess a disposiziun 100 bus per transportar ils fugitivs al cunfin dal vest. Intgins fugitivs hajan dumandà plain skeptica sch'ils bus transporteschian els vairamain al cunfin u danovamain en in champ da fugitivs.

L'emprim bus cun fugitivs ord l'Ungaria è arrivà la notg al cunfin cun l'Austria. Là sajan els vegnids beneventads d'Austriacas ed Austriacs cun applaus, placats da bainvegni e mangiativas scriva l'agentura ungaraisa MTI.

Spetgà fin 1'500 persunas

La Crusch cotschna austriaca quinta cun l'arrivada dad 800 fin 1'500 fugitivs las proximas uras en la vischnanca da cunfin Nickelsdorf. Letgs, mangiativas e provediment medicinal sajan preparads ha ditg in pledader da l'organisaziun d'agid.

In tren spezial duai lura transportar ils fugitivs arrivads dal cunfin a Vienna. Quai ha declerà il schef da la polizia dal Burgenland.

RR novitads 06:00

Artitgels legids il pli savens