Siglir tar il cuntegn

Header

Kurz cun tschera pensiva.
Legenda: Uss èsi da guvernar – l'anteriur chancelier austriac Sebastian Kurz la dumengia suenter l'elecziun. Keystone
cuntegn

Austria suenter las elecziuns Sfida per Kurz continua – suenter il gudagnar èsi da guvernar

Uss ha la partida victura ÖVP da chattar partenaris da coaliziun per furmar ina regenza – e quai na vegn betg simpel.

Suenter avair gudagnà cleramain las elecziuns parlamentaras en Austria stan l'anteriur chancelier Sebastian Kurz e sia ÖVP avant la proxima sfida: chattar in partenari da coaliziun che vul guvernar ensemen cun el l'Austria.

Che quai na vegn betg ad esser simpel mussan las emprimas reacziuns da las autras partidas, che vegnan rapportadas da las agenturas da medias sco la SDA.

Da sceptica fin annunzia dad ir en opposiziun

Il resultat na dettia nagina incumbensa da furmar ina coaliziun, ha ditg Harald Vilimsky, il secretari general da la FPÖ, l'anteriur partenari da regenza da la ÖVP. Il schef da la FPÖ, Norbert Hofer, ha gia annunzià ch’ins vegnia a sa preparar sin l’opposiziun.

Er la Partida verda ha reagì scepticamain sin la dumonda dad ina colliaziun cun la partida conservativa. Ins veglia en emprima lingia far dapli per la politica d’ambient e la transparenza tar la finanziaziun da partidas.

Sebastian Kurz ha annunzià da vulair manar discurs cun tut las partidas che sajan represchentadas en il parlament per evaluar tut las opziuns da furmar ina nova regenza.

Ils resultats da las elecziuns – en curt:

Personen-Box aufklappenPersonen-Box zuklappen

En l'Austria gudogna la partida conservativa ÖVP da l’anteriur chancelier Sebastian Kurz las elecziuns parlamentaras. Tenor resultat provisoric vegn la ÖVP sin passa 37% da la vuschs. Quai fiss in plus da bunamain 6 puncts cumpareglià cun las elecziuns dal 2017.

Laschar plimas sto dentant la partida da la dretga FPÖ. Suenter l’affera d’Ibiza enturn l’anteriur vice-chancelier Heinz-Christian Strache perda la FPÖ bunamain 10 puncts e vegn da nov anc sin radund 17%.

Enavos en il parlament turnan ils Verds cun bun 14% da las vuschs.

RR novitads 06:00+