Autos novs dovran massiv dapli carburant ch'inditgà

Autos novs dovran en l'Europa en media 42% dapli carburant che quai ch'ils constructurs inditgeschan. L'onn 2013 muntava quella cifra anc a 25%. Quai resulta ord in studi independent dal «International Council on Clean Transportation» (ICCT).

Sbuf cun massa fim Bild in Lightbox öffnen.

Legenda da maletgs: Pli autas emissiuns ch'inditgà dals constructurs. Keystone

Sursiglir cuntegn supplementar

ICCT

L'ICCT è l'institut da perscrutaziun independent ch'ha revelà il scandal da diesel tar il concern dad autos VW en ils Stadis Unids da l'America avant dus onns.

Uschè gronda na saja la differenza tranter il diever da carburant inditgà ed il diever effectiv anc mai stada, ha ditg il manader da fatschenta da ICCT Peter Mock. Quest consum pli aut muntia pli auts custs per ils automobilists, ma era ina pli gronda impestaziun da l'ambient.

Ina raschun per quella gronda differenza sajan las circumstanzas da mesiraziun. Per las indicaziuns dals constructurs vegnian ils tests fatgs en labors. Il diever effectiv mesira l'institut independent dentant en il traffic real.

L'Uniun europeica ha fixà cunfins d'emissiuns da CO2 pli severs per l'onn 2021. Tenor ina analisa da la societad da cussegliaziun MSCI possia dentant strusch in constructur d'autos tener en quella limita.

RR novitads 12:00