Siglir tar il cuntegn
cuntegn

Exteriur Avertiment da substanzas privlusa suenter havaria da «MSC Zoe»

Suenter che la MSC Zoe ha pers 270 containers en la Mar dal Nord mesemna passada durant in stemprà, averteschan las autoritads d'esser precaut. Entant che bastiments spezialisads cun sonars tschertgan ils containers pers sin il fund da la mar, regia a la costa frislandaisa stadi d'auta attenziun. La populaziun da l'insla Borkum è vegnida avertida che containers ubain era substanzas dals containers pudessian rivar tar l'insla - e da betg tutgar quai.

Betg anc cler, quants containers ch'èn contaminads

Tge ch'ils containers cuntegnian, n'è betg anc publitgà. Quants containers che cuntegnan substanzas privlusas n'è era betg cler. Entant che la guardia da costa dals Pajais Bass quinta cun 3 containers contaminads, quinta il commando da havaria a Cuxhaven cun 1 container cun substanzas privlusas. Suenter in discurs cun la squadra aveva il commando declerà ch'i sa tractia tar la substanza da Dibenzoylperoxid – ina substanza ch'ins dovra per producir materia sintetica e che po explodir en chaliras.

MSC lascha tschertgar

Las bartgas cun sonars ha la societad da navigaziun «MSC» a Genevra incumbensà cun la tschertga. La medema interpresa duai era coordinar las lavurs da schubregiar las costas e rivas, communitgescha la «Mediterranean Shipping Company MSC».

MSC Zoe – ina da las pli grondas navs da vitgira dal mund

La nav da vitgira «MSC Zoe» era sin viadi dad Antwerpen a Bermerhaven, cura ch'ella è gartegiada en in stemprà ed ha pers 270 containers. La nav da vitgira da la societad svizra è cun bunamain 400 meters lunghezza ina da las pli grondas dal mund. Ella po chargiar passa 19'000 containers.

RR novitads 16:00