Siglir tar il cuntegn
cuntegn

Exteriur Avertura d'ina ambassada a Jerusalem chaschuna dispitas

Emna dramatica en l'Israel. Ils Stadis Unids vulan transferir lur ambassada da Tel Aviv a Jerusalem. Questa midada chaschuna discussiuns e las autoritads quintan cun protestas vehementas dals Palestinais.

Amassada dals Stadis Unids a Jerusalem.
Legenda: Cun gronda preschientscha militara duai glindesdi vegnir inaugurada l'amassada dals Stadis Unids a Jerusalem. Ins quinta cun protestas vehementas dals Palestinais. Keystone

Cun gronda preschientscha militara sa prepara il stadi Israel sin il giubileum da 70 onns che vegn celebrà glindesdi. Ed era l'ambassada dals Stadis Unids vegn transferida da Tel Aviv a Jerusalem. Da far quest pass aveva il president american Donald Trump gia annunzià il december passà. Uschia renconuschan ils Stadis Unids sco chapitala da l’Israel. Entant che l’Israel beneventà la decisiun dals Americans, vegn quella crititgada da la cuminanza internaziunala.

Aspectaturs d'aut rang

Il minister da finanzas dals Stadis Unids Steven Mnuchin è arrivà dumengia a la testa d'ina gronda delegaziun. Era la figlia dal president Ivanka Trump e ses um vegnan ad esser preschents tar l'avertura da l'ambassada.

Ins quinta cun protestas vehementas

Ils ambassadurs dals blers stadis na sa participeschan betg a l’inauguraziun da l’ambassada americana. Il status da la citad da Jerusalem è numnadamain fitg dispitaivel e chaschuna dapi decennis conflicts tranter Israelians e Palestinais.

En vista a las festivitads a Jerusalem quintan las autoritads cun protestas vehementas dals Palestinais. L’Israel ha perquai rinforzà las mesiras da segirezza.

RR novitads 06:00