Siglir tar il cuntegn

Exteriur Aviatica militara egipziana reagescha suenter attaca terroristica

Suenter l'attatga terroristica sin ina moschea en il nord da la peninsla egipziana Sinai ha l'aviatica militara attatgà plirs lieus. Tenor l'armada èn vegnids attatgads zups da terrorists. Il dumber dals morts è creschì sin 305. 128 persunas sajan blessadas. Quai ha communitgà la procura publica.

Moschea Bir al-Abed
Legenda: Tar la moschea a Bir al-Abed èn las bumbas detunadas. Keystone

Tar l'attatga al Sinai sa tracti dad ina da las pli grevas attatgas terroristicas da l'Egipta. Il militar saja sin il lieu e na dettia betg luc, fin che tuts che hajan participà a l'attatga sajan eliminads. Quai rapporta la gasetta statala «Al Ahram», sa referind sin circuls da segirezza.

Plinavant ha la procura publica communitgà ch'ils 25 tochen 30 attentaders hajan fatg sgulatschar bandieras da milissa terroristica Stadi Islamic (SI).

Unfrendas da l'attentat

Ils attatgaders avevan envidà ina chargia explosiva e lura sajettà sin persunas cartentas avant la moschea. Tar l'attatga sin la moschea èn mortas 305 persunas. Tranter las unfrendas sa chattian era 27 uffants. Passa 128 ulteriuras persunas èn blessadas. Uschia ha declerà la procura publica.

RR novitads 06:00+