Il schef dal stab general russ Waleri Gerassimow ed il general da la NATO Petr Pavel hajan discurrì al telefon co ch'ins possia evitar «incidents militars». Quai communitgescha il ministeri da defensiun russ.
Suenter l'annexiun da la peninsla ucranaisa Crim entras la Russia avevan la Russia e la NATO interrut ils discurs l'avrigl 2014. Pir l’onn 2016 aveva dat puspè duas sesidas dal cussegl sin livel dad ambassadurs. Quellas n’avevan dentant betg porta fritg.
Ils ultims mais avevan tant la NATO sco er la Russia crititgà vicendaivlamain manevras aviaticas privlusas sur l’Atlantic, la Mar da l’Ost e la Mar Naira. Sur la Siria èn tant jets da cumbat da la Russia sco er da la NATO en acziun.
Gerassimow ha crititgà en il discurs il staziunament da schuldada da la NATO en ils pajais baltics. Per la NATO è quai sia reacziun al rearmament da la Russia a ses cunfin en il vest.
RR novitads 14:00