Ins observeschia la situaziun, ha ditg ina pledadra da la Swiss sin dumonda dad SRF. Da principi possian ils sgols en Russia e l'Asia vegnids manads sur la Bielorussia - tut tenor situaziun dal vent però er en il nord u il sid dal pajas. La segirezza haja la pli auta prioritad. La Lituania ha entant annunzià che la AirBaltic eviteschia per il mument il spazi aviatic bieloruss.
Gronda critica internaziunala
La cuminanza internaziunala ha condemnà l'acziun da la Bielorussia d'atterrar per sforz in aviun a Minsk per arrestar in blogger opponent.
- Per la presidenta da la cumissiun da l'UE, Ursula von der Leyen, è in tal agir betg acceptabel. Ella pretenda consequenzas. Il president dal cussegl da l'UE, Charles Michel, ha ditg che l'acziun vegnia ad esser tema a l'inscunter suprem da l'UE che cumenza oz.
- Il minister da l’exteriur american, Anthony Blinken, ha discurrì d’in’acziun schoccanta dal reschim da Lukaschenko.
- Il Departament federal per affars exteriurs EDA pretenda da la Bielorussia ch'il blogger opponent Roman Protassewitsch vegn laschà liber.
«I saja absolutamain inacceptabel da sfurzar in sgol regular d'atterrar a Minsk» scriva Ursula von der Leyen sin Twitter. Violaziuns da las reglas da sgol internaziunalas stoppian avair consequenzas.
Inscunter extraordinari discutescha consequenzas
L'incap e pussaivlas sancziuns cunter la Bielorussia èn er tema a l'inscunter extraordinari da l'UE a Brüssel, ch'era però planisà tuttina. Il president dal cussegl da l'UE Charles Michel tematiseschia l'incap, ha communitgà ses pledader. Michel sez ha fatg a savair che l'«incap maludì» na restia betg senza consequenzas.
Tge è capità?
Autoritads da la republica autoritara dal president Alexander Lukaschenko avevan sfurzà in aviun da la Rynair d'atterrar en la chapitala da Minsk. L'aviun sgulava dad Aten direcziun da la Lituania.
A bord eran sper passa 100 passagiers era il blogger Roman Protassewitsch che vegn tschertgà internaziunalmain da la Bielorussia. El saja vegnì arrestà immediat sin l'eroport da Minsk, rapporta il center per ils dretg d'umans Wesna.