La crudada da l'aviun da Lion Air cun 189 persunas a bord, la fin october, avess probablamain pudì vegnir evitada. Tenor il rapport intermediar haja dà gia il di avant problems cun l'aviun ed el n'avess betg pli pudì sgular. Ils investigaders han er confermà ch'ils pilots hajan quasi da l'entschatta davent gì da cumbatter da betg crudar giu cun l'aviun. I vegn supponì ch'in sbagl da la software è la culpa.
L'aviun quasi nov è crudà ils 29 d'october en la mar, be 11 minutas suenter il start en la chapitala indonaisa, Jakarta. Tenor il rapport saja l'aviun sfratgà cun ina spertadad enorma da 715 kilometers l'ura sin l'aua. Dals 189 passagiers n'ha nagin survivì.
L'apparat che noda las datas or dal cockpit han ins entant chattà. Sin fundament da quellas datas han ils investigaders fatg il rapport intermediar. Il recorder da vuschs che registrescha ils discurs e tut ils tuns en il cockpit, n'han ins anc betg chattà al funs da la mar.
RR novitads 09:00