Las giugadras da la naziunala spagnola da ballape han terminà lur boicot pervi da l'affera da bitschar. Quai è succedì suenter che la federaziun spagnola ha fatg concessiuns ed empermess midadas da structura. Avant eran giugadras, funcziunaris, il cussegl da sport ed ils sindicats da las giugadras s'inscuntrads durant set uras en in hotel da manaivel da Valencia. Damaun duai la cunvegna vegnir suttascritta.
La raschun per l'indignaziun da las giugaduras è l'affera enturn ina bitschada che Luis Rubiales ha dà ad ina da las giugadras da l'equipa naziunala suenter la victoria dal campiunadi mundial - lura anc en sia funcziun sco president da la federaziun da ballape spagnola. La bitschada na saja betg stada consensuala. Suenter emnas da protests è Rubiales sinaquai sa retratg da ses post. Ils proxims dis spetgan gieus cunter differentas equipas, tranter auter la naziunala svizra.