Suenter che la Banca centrala europeica EZB lascha il tschains directiv sin il nivel bass d'enfin uss ed augmenta il tschains negativs, gudogna l'euro envers il franc svizzer. Il mument noda l'euro tar 1,09 francs - in plus da 0,99%.
Ed era envers il dollar american è l'euro creschì temporarmain per 2,6% sin 1,0890. Tenor l'agentura da novitads sda munta quai che la bursa quintava cun mesiras anc pli severas davart l'EZB.
Il tschains negativs augmenta la EZB da 0,3 sin 0,5%. Uschia ston las bancas pajar dapli per deponer daners tar ella.
Reacziuns da la bursa svizra
Entant mainan las decisiuns da la Banca centrala europeica a perditas tar la bursa svizra. Curt avant che la EZB ha infurmà era l'index anc tar 9'000 puncts. Actualmain noda l'SMI tar 8'935 puncts. Quai è in minus da 0.90%.
La strategia dal daner bunmartgà pudess vinavant far donn a l'industria d'export svizra ed al turissem. Ils products da la Svizra vegnan pli chars per cumpraders da la zona da l'euro.
RR novitads 15:00