La banca naziunala americana FED sbassa per la segunda giada entaifer duas emnas il tschains directiv. Quai sin in nivel datiers da nulla. Cun quest pass vul ella proteger l'economia americana da las consequenzas da la pandemia da Covid-19 chaschunà dal coronavirus.
Ultra da quai ha annunzià la banca d'emissiuns americana in pachet da mesiras cunter la crisa cun cumprar emprests per sustegnair la conjunctura – quai en la valita da pliras milliardas. Questa midada fa part d'in pachet da mesiras concertà dals instituts d'emissiuns mundials en il cumbat da l'epidemia da coronavirus.
Era la banca naziunala giapunaisa schlucca sia politica da daners. Sco quai che la «Bank of Japan» communitgescha, vul ella era far investiziuns en fatschentas pli ristgadas. Ins saja era pront da schluccar vinavant la politica da daners, sche quai saja necessari per sustegnair l'economia, ha ditg il schef da la banca centrala Haruhiko Kuroda. Las finamiras per ils tschains vul la banca anc salvar.