Siglir tar il cuntegn

Header

Navigaziun

cuntegn

«Bandiera» svizra sin la glina Fatgs main enconuschents

Avant 50 onns è l'Apollo 11 sa platgada sin la glina. Avant la bandiera dals Stadis Unids da l'America han ins plazzà ina «bandiera» da la Svizra che fascheva part d'in experiment da la missiun Apollo 11.

Passa ina mesa milliarda carstgauns ha persequità a la televisiun sco l'astronaut Neil Armstrong ha mess ils 21 da fanadur 1969 sco emprim carstgaun ses pe sin la glina. Curt suenter Armstrong ha era Buzz Aldrin mess ses pe sin la glina. Il terz astronaut da la missiun «Apollo 11», Michael Collins, è restà enavos en la recheta. Ils 24 da fanadur 1969 èn ils astronauts puspè sa platgà sin la terra.

La cursa tar glina è en emprima lingia stà in duel tranter il chapitalissem ed il communissem, tranter l’America e l’Uniun sovietica. Il project dad Apollo ha custà var 24 milliardas dollars. En tut han radund 400'000 persunas lavurà direct ni indirect vid il project. Tranter ils onns 1969 e 1972 èn en tut 12 astronauts stads sin la glina. Els han rimnà radund 400 kilos crappa.

Tge è capita cun la bandiera?

Enfin oz èn bandieras sin la glina. Quai san ins grazia fotografias d'ina sonda. Sch'ina da quellas bandieras è er l'emprima, na san ins betg. Tiers han las bandieras er pers la colur. Tras il sulegl èn las bandieras daventadas alvas.

La «bandiera» da la Svizra sin la glina

Er la Svizra era cun in experiment part da la missiun Apollo 11. Cun ina folia vulev'ins perscrutar la cumposiziun dal sulegl. Cunquai ch'ins n'aveva betg bler temp sin la glina, han ins sco emprim miss si la folia e pir suenter la bandiera dals Stadis Unids da l'America. La folia han ins returnà a l'universitad da Berna. Suenter tut ils test han ins salvà ina pitschna part da la folia sco regurdanza.

Cumprar ina part da la glina

Sin pliras paginas d'internet san ins cumprar parts da la glina. Quant legal che quai è, n'è betg cler. La lescha prescriva che nagina regenza sa esser possessur da la glina. Sur da persunas privatas na datti naginas leschas. Perquai ha Dennis Hope decidì ch'el è il possessur da la glina e cun vender parcellas ha el fatg ina massa raps.

RR chavazzin dal di