Exteriur - Bastiment d’agid da l’ONU cuntanscha Aden
Per la prima giada dapi il cumenzament dal conflict en il Jemen ha in bastiment cun rauba d'agid da l'ONU cuntanschì la citad da port Aden. Cun questa rauba possian radund 180'000 persunas vegnir provedidas cun il pli necessari durant in mais, communitgescha l'ONU.
Il program d’alimentaziun mundial valitescha quest’arrivada sco success. Fin ussa n'eran Aden ed autras provinzas en il sid dal pajais betg cuntanschiblas per l'agid internaziunal.
L’emna passada eran ils rebels da Huthi vegnids stgatschads ord la citad Aden. En il Jemen dovran tenor las Naziuns Unidas radund 13 milliuns persunas urgentamain agid.
