Siglir tar il cuntegn

Header

Navigaziun

cuntegn

Bastiments ucranais Mar Naira Dretgira decida per Ucraina e cunter Russia

En il cas dal november passà cura che la Russia ha confiscà bastiments urcranais ed arrestà mariners hai uss dà ina sentenzia. La dretgira internaziunala maritima a Hamburg ha decidì per l'Ucraina e cunter la Russia.

La dretgira maritima internaziunala a Hamburg ha decidì che la Russia sto laschar liber immediat 24 mariners ucranais arrestads. Vitiers sto la Russia dar enavos a l'Ucraina ils bastiments confiscads dapi il november, han decidì ils derschaders.

La Russia refusa la cumpetenza da la dretgira maritima internaziunala e boicottescha la procedura. Moscau è da l'avis ch'ina dretgira indigena haja da decider il cas.

La preistorgia

Ils mariners avevan empruvà il november passà da navigar da la Mar Naira en la Mar Asowscha. La Russia ha sinaquai arrestà quels. Dapi lura èn quels mariners en arrest d'inquisiziun a Moscau.

carta cun la stretga da la mar.
Legenda: L'incident è capità ils 26.11.2018 avant la peninsla Crim en la via da Kertsch, tranter la Crim e la Russia. SRF

La dispita stat en il context da la situaziun cumplitgada cura che la Russia ha annectà la peninsla Krim l'onn 2014. Tant la Ucraina sco er la Russia dovran la stretga da la mar Kertsch tranter la Crim e la Russia. La Russia è dentant da l'avis che quella è ses territori naziunal – er sch'i dat in contract dal 2003 che garantescha a la Ucraina da navigar tras. Pervia da quai vul Moscau metter ils mariners davant dretgira cun l'argument che quels hajan violà il cunfin dal stadi. Kiew è dentant da l'avis ch'ils mariners èn praschuniers da guerra.

RR novitads 17:00