Siglir tar il cuntegn

Header

cuntegn

Exteriur BCE augmenta agid d’urgenza per bancas greccas

Per garantir la liquiditad da las bancas greccas, ha la Banca centrala europeica BCE augmentà ses agid d'urgenza.

Confermà l'augment a l'agentura da novitads Reuters ha ina persuna ch'enconuscha il dossier. Quant fitg che la Banca centrala europeica ha augmentà l'agid na vegn betg communitgà. La Banca centrala grecca aveva para dumandà 3 milliardas euros.

Entant cuntinueschan ils Grecs da prender lur daners giu da lur contos per transferir quels en l'exteriur u per prender quels a chasa.

Relaziuns tendidas tranter UE e Grezia

Las relaziuns tranter l'Uniun europeica e la Grezia vegnan pli e pli tendidas. Curt avant l'inscunter suprem da l'UE davart la crisa da finanzas da la Grezia, sa mussa il president da la cumissiun da l'UE Jean-Claude Juncker frustrà davart las tractativas. En in'intervista cun il magazin tudestg «Spiegel» na sclauda Juncker betg pli l'extrada da la Grezia da la zona da l'euro.

Er il minister da finanzas tudestg Wolfgang Schäuble ha ditg ch'el na saja betg propi optimistic ch'i dettia ina schliaziun il glindesdi.

RR novitads 18:00

Artitgels legids il pli savens