Belgia: 3 suspectads da terror restan en arrest

Suenter la gronda acziun anti-terror da la polizia belgia la notg passada, restan 3 persunas suspectadas en arrest.

In polizist beltg cun arma Bild in Lightbox öffnen.

Legenda da maletgs: La polizia belgia ha puspè gì blera lavur ils davos dis. Keystone

La Procura publica rinfatscha als 3 arrestads, tuts burgais da la Belgia, d’avair empruvà in murdraretsch terroristic e d'avair participà ad ina gruppaziun terroristica. Ils umens da 27, 29 e 40 onns aveva la polizia tschiffà en acziuns en l'entir pajais. Nov ulteriurs suspectads ch'eran vegnids tschiffads ha la polizia entant relaschà suenter interrogaziuns.

In'acziun da gronda dimensiun

La polizia belgia aveva fatg razzias en chasas e garaschas en 16 vischnancas, tranter auter er a Molenbeek. Ed ella aveva intercurrì radund 40 abitaziuns ed interrogà numerusas persunas. Armas ubain material explosiv n'aveva la polizia dentant betg chattà. Ils resultats dad inquisiziuns hajan dentant sfurzà in'acziun, havevi gì num.

In'ulteriura arrestaziun

Gia avant aveva la polizia belgia annunzià ch’els hajan arrestà in um en connex cun il attentats da terror il mars passà a Brüssel sin la plazza aviatica e sin la lingia da metro da la citad da Brüssel. Tar quests attentats eran mortas passa 30 persunas.

RR novitads 12:00/21:00