Tgi ch'è sta davos la roda da manar e sch'i sa tracta d'insatgi che ha manà intenziunadamain l'auto en la fulla da glieud, n'è anc betg cler. In pledader da la procura publica ha accentuà tar ina conferenza da pressa ch'i na dettia nagins indizis per in'attatga terroristica. Las duas persunas ch'eran en l'auto sajan tenor sias indicaziun da la regiun e sajan vegnidas arrestadas. La vischnanca nua che l'inzident è capità è radund 40 kilometers en il sidvest da Brüssel. La citad ha radund 9'000 abitantas ed abitants.
Il manischunz da l'auto saja anc charrà vinavant suenter ch'el era ì en las persunas, ha dentant pudì vegnir franà pli tard. Sco il president da la citad haja declerà, saja l'auto charrà cun grond tempo en la gruppa. Il president ha discurrì d'ina catastrofa. Tenor il procuratur public pudess smanatschar a las duas persunas in'accusa pervi da murdraretsch. Ils dus umens n'eran betg enconuschents a la polizia ed èn da las annadas 1988 e 1990.