En la regiun Bergkarabach datti in armistizi. Quai han confermà tant la vart armena sco er quella da l'Aserbaidschan. L'armistizi saja vegnì intermedià da la Russia. Tenor la vart aserbeidschana cumpiglia quel che las truppas armenas bandunan la regiun e che cumbattants armens locals dattan giu lur armas. Damaun duain plinavant cumenzar discurs per reintegrar Berbkarabach en l'Aserbeidschan. L'enclava Bergkarabach sa chatta sin territori da l'Aserbaidschan – vegn dentant abitada surtut da persunas armenas.
Morts e blessads dapi l'escalaziun
Dapi l'offensiva militara da l'Aserbaidschan en la regiun Bergkarabach èn tenor las autoritads localas da l'Armenia almain 27 persunas vegnidas mazzadas e 130 blessadas. Plinavant èn 7000 persunas da 16 vitgs vegnidas evacuadas. L'Aserbeidschan ha lantschà in'operaziun militara per conquistar l'enclava Bergkarabach. La finamira saja da stgatschar il militar armen da la regiun, sco concludì da l'armistizi dal 2020.
Entant ha l'Armenia intimà il cussegl da segirtad da l'ONU e la Russia da prender mesiras per terminar l'operaziun militara. L'Uniun europeica ha condemnà l'acziun fermamain e pretendì da l'Aserbeidschan da franar immediatamain l'intervenziun militara. Ins stoppia turnar al dialog.
