Sut il stritg sajan las cifras anc adina sin il livel da l'entschatta da l'onn. La situaziun actuala saja perquai anc betg dramatica, di Gliott.
Gia dapi il mez da zercladur dettia indizis da la crisa. Gasettas d'economia hajan adina puspè scrit da quai, sulet las gasettas quotidianas n'hajan betg prendì si quai. La raschun per la crisa actuala vesa Gliott en il fatg che l'economia da la China na crescha betg pli tant sco spetgà. Vitiers hajan adina dapli Chinais investì en aczias ed ussa, cura ils curs han cumenzà da vegnir pli flaivels, survegnì tema. Uschia hajan blers vendì lur aczias e questas han pers da lur valita. Quai na saja betg mo da donn. Ferms investiders cumprien uschia las aczias pli bunmartgadas. Las bursas europeicas mussian gia che la situaziun sa calmia.
Malgrà quests signals positivs quinta Damian Gliott ch'ils curs en la China restian ils proxims dis fitg volatils, vul dir ch'il curs giaja inagiada 5 % ensi e lura puspè 5 % engiu.