Ils dazis da multa sin aluminium ed atschal na duain definitivamain betg valair per tut ils pajais: Ils 28 stadis da l'Uniun europeica, sco er la Corea dal Sid, l'Argentina, l'Australia, la Brasilia, il Mexico e la Canada duain vegnir deliberads dals dazis. Quai almain fin il prim da matg.
China è pronta da dar enavos
Per la China han ils Stadis Unids dentant fixà nagina deliberaziun dals dazis. Il president american ha suttascrit in pachet che prevesa dazis da multa ed autras mesiras cunter ils products chinais en valita da 60 milliardas dollars.
Quai n'accepta la China betg simplamain uschia. Ed ha per consequenza preparà ina replica: La China ha medemamain publitgà ina glista cun dazis sin products americans en ina valita dad enfin 3 milliardas francs. Ils dazis pertutgan per exempel fritga setgentada, vin u charn portg. En vigur giajan quests dazis, sch'ins na vegnia betg perina cun ils Stadis Unids, ha il ministeri da commerzi chinais declerà.
USA porta plant cunter la China
Sco reacziun sin las mesiras da la China engrevgieschan ils Stadis Unids il conflict economic cun la China: L'America inoltrescha in plant a la WTO, l'organisaziun dal commerzi mundial en connex cun il dretg da patentas. Ils Stadis Unids renfatschan a la China d'avair engulà proprietad intellectuala. Uschia vegl'ins cumbatter las praticas nunfairas da la China en la sparta tecnologia, ha declerà il biro da l'incumbensà da commerzi american. Il plant è part d'in pachet da mesiras ch'il president american Donald Trump ha annunzià. Er cuntegnids en il pachet èn ils dazis da multa sin imports d'atschal ed aluminium.
RR novitads 06:00