Cun in video sin Youtube ha il president dals Stadis Unids Donald Trump ditg adia. El ha giavischà buna fortuna a la nova regenza – dentant senza numnar ses successur cun il num.
En ses video ha Trump adina puspè fatg attent sin ses agen success, sco per exempel sin la politica d’economia avant la pandemia da corona. Er saja el losch dad esser l’emprim president american dapi decennis che n’haja betg cumenzà ina nova guerra. Plinavant ha el declerà ch’il moviment ch’el haja lantschà, haja pir cumenzà.
Curt avant la fin da ses temp d’uffizi fa il president american grazia cun ses anteriur schef-strateg Steve Bannon. A Bannon vegn rinfatscha d’avair defraudà daners d’ina acziun da donaziun per la construcziun d’in mir al cunfin cun il Mexico. El sez refusescha tut las rinfatschas. Il process cunter Bannon è stà planisà la primavaira.
Inauguraziun sut circumstanzas spezialas
Tant la pandemia sco er l'attatga sin in capitol d'avant duas emnas han influenza sin l'inauguraziun. Uschia ha l'inauguraziun lieu senza public. Sin la tribuna vegnan ad esser var 200 persunas envidadas. Sin il pastget avant il capitol dettia anc plaz per 1'800 osps. L'inauguraziun vegn dentant mussada en la televisiun.
Vinavant èn las mesiras da segirezza fitg autas. La chasa alva ed il capitol vegn protegida da var 25'000 schuldads da la garda naziunala.
Ord l'archiv
Joe Biden daventa oz la persuna la pli pussanta dal mund. Tgi è el dentant?
