Ambassadas e consulats svizzers en l’exteriur deponan documents da Svizzers en l’exteriur anc adina en furma stampada. Perquai pretenda la Controlla federala da finanzas da questas represchentanzas diplomaticas da far vinavant cun la digitalisaziun. Dentant stoppia er il persunal vegnir integrà en quest process, hai num en in rapport davart ils servetschs consulars.
Blers emploiads temian numnadamain per lur plazza da lavur. Malsegirezza dettia er perquai che consulats vegnian serrads e che purschidas vegnian prendidas ensemen. I dettia grondas differenzas tranter la direcziun dada avant da Berna e la realitad al lieu, uschia il sentiment dals pertutgads.