La cumissiun d'etica da la federaziun internaziunala da ballalpe FIFA ha suspendì il president da la federaziun tailandaisa Worawi Makudi. Ad el vegn renfatschà d'avair cuntrafatg al code d'etica da la FIFA. La raschun concreta na vul la cumissiun però betg numnar avant la sentenzia definitiva. Las investigaziuns cunter Makudi continueschan.
Funcziunari sentenzià pervi da sfalsificaziun da documents
Makudi è stà commember dal comité executiv da la FIFA fin il matg. Il fanadur è el vegnì sentenzià dad ina dretgira a Bangkok ad 1 onn e 4 mais cundiziunà. Là pervi da sfalsificaziun da documents uffizials. Makudi era gia pliras giadas vegnì inculpà da d'esser corrupt e d'avair defraudà daners.
Era Blatter, Valcke e Platini èn suspendids
L'emna passada aveva la cumissiun d'etica gia suspendì per 90 dis il president da la FIFA Sepp Blatter, il president da la UEFA Michel Platini ed il secretari general da la FIFA Jérôme Valcke.
RR novitads 17:00