Il scandal da corrupziun davart set funcziunaris da la FIFA n’ha gì nagina influenza sin l’elecziun da Joseph Blatter. Il Vallesan da 79 onns resta president da la FIFA e cumenza cunquai sia 5avla perioda d’uffizi.
73 vuschs per prinzi Ali
Il cuntracandidat, il prinzi Ali bin al-Hussein ha dà si il venderdi saira al congress da la FIFA a Turitg suenter l’emprim scrutini. Blattar aveva fatg en l’emprim scrutini 133 vuschs ed uschia be manchentà il surpli da dus terz. Il prinzi Ali, ch’è cunzunt vegnì purtà da las grondas federaziuns europeicas e dal president da l’UEFA, Michel Platini, ha fatg 73 vusch. Pli probabel è era il president da la federaziun svizra Peter Gilliéron suandà a la recumandaziun da la UEFA ed uschia vuschà per il prinzi Ali.
«Vegn a surdar ina FIFA robusta»
L’elecziun ha cuzzà prest duas uras, perquai ch’ils 209 delegads da las singulas federaziuns da ballape, n’han betg pudì vuschar electronicamain, mabain sin proposta dals Stadis Unids han els stuì vuschar mintg’in singul en scrit.
Joseph Blatter ha annunzià da sa retrair suenter sia 5avla perioda d’uffizi sco president da la FIFA il 2019. «A la fin da mia perioda d’uffizi, vegnia jau a surdar a mes successur la FIFA, ina FIFA robusta», ha ditg Joseph Blatter a Turitg.
Il president da l'associaziun da ballape Svizra gratulescha a Blatter
Il president da l’associaziun da ballape Svizra Peter Gillieron ha gratulà a Sepp Blatter per sia elecziun sco president da la FIFA. Impurtant saja uss da tschertgar il dialog e da chattar soluziuns che la FIFA vegnia ord la mumentana crisa, ha ditg il schef da l’associaziun da ballape Svizra.
Luis Figo discurra d'in «di nair» per il ballape mundial
Il portugais Luis Figo che ha retratg sia candidatura per il presidi da la FIFA l’emna passada ha discurri dad in di nair per la FIFA. «La FIFA ha pers, ma era il ballape e mintga persuna che fa quitads per il ballape mundial. Blatter è responsabel per il punct nua che la FIFA stat il mument», ha ditg Figo.
RR novitads 20:00
