Bleras unfrendas tar accident da tren en l’Egipta

Suenter il grev accident da tren ad Alexandria è il dumber da morts s'augmentà sin 49. 123 ulteriuras persunas sajan vegnidas blessadas. Quai rapporta la televisiun statala.

Ina disgrazia da tren Bild in Lightbox öffnen.

Legenda da maletgs: Blera glieud è sa radunada enturn ils vaguns da tren demolids ad Alexandria. Keystone

In dals locomotivists participads saja sa denunzià tar la polizia. El saja en arrest d’inquisiziun. Quai rapporta la gasetta Al-Ahram. L'accident saja capità ad Alexandria suenter ch'in tren nà da Cairo saja charrà da davos en in tren che spetgava.

Il president Abdel Fattah al-Sisi ha empermess da sclerir la raschun da l'accident tant pli spert ed ha exprimì condolaziuns a las unfrendas. Las famiglias da las unfrendas duajan vegnir indemnisadas cun 50'000 glivras egipzianas, radund 2'700 francs svizzers.

Adina puspè grevs accidents da tren

I sa tracta dal pli grev accident da tren en l'Egipta dapi plirs onns. Il november 2013 eran mortas 27 persunas tar ina collisiun tranter in tren ed in bus en la chapitala da Cairo.

Il pli grev accident da tren en l'India avevi dà l'onn 2002, cura ch'in tren fullanà aveva piglià fieu. Lura avevi dà 373 unfrendas.

RR novitads 20:00+