Siglir tar il cuntegn
cuntegn

Exteriur Bloccadas en la Frantscha – 283'000 «gilets jaunes» protesteschan

Las demonstraziuns cunter las taglias pli autas sin carburants custan la vita ad ina demonstranta. Ella mora tar ina reacziun da panica ad ina bloccada. Quai rapportan agenturas da novitads sco l’agentura tudestga DPA.

Ina da las bloccadas.
Legenda: En tut la Frantscha haja quai dà passa 2'000 acziuns e bloccadas. Keystone

Dieschmillis da «gilets jaunes» protesteschan tar radund 2’000 acziuns en tut la Frantscha cunter taglias pli autas sin carburants. «Gilets jaunes» – gilets mellens – vegnan ils demonstrants numnads pervi ch’els portan ils gilets mellens che mintga automobilist da l’UE ha da manar cun sai en l’auto.

Ils «gilets jaunes» han clamà – passa 283'000 èn vegnids

Tenor las autoritads sajan radund 283’000 persunas seguidas al clom dals «gilets jaunes» e sajan idas a protestar sin via – bloccond vias impurtantas, rondellas e staziuns dad enchaschar taxas da via.

En mira han ellas ils augments da taglias sin carburants che la regenza Macron planisescha. I sa tractia bain dad ina taglia ecologica che saja a favur da la societad, scriva l'agentura franzosa AFP; ma la malcuntentientscha saja pli generala ed i vegnia renfatschà a la regenza da betg avair en egl la realitad da blera glieud.

1 persuna è morta ed almain 229 èn vegnidas feridas

Durant ils protests hai dà differents incaps violents. Datiers da Grenoble è morta ina demonstranta tar ina bloccada sin la via cur ch’ina automobilista traplada era vegnida en panica.

En tut sajan vegnidas feridas almain 229 persunas – set dad ellas grevamain, communitgescha il ministeri da l'intern franzos la sonda suentermezdi. Almain 117 persunas sajan vegnidas arrestadas ed almain 73 prendidas en fermanza.

RR novitads 12:00++