Siglir tar il cuntegn

Header

Purtert da Michael Bloomberg durant il pled.
Legenda: Il republican Donald Trump mainia ina campagna «sfendenta e provocanta», da ditg Michael Bloomberg. Keystone
cuntegn

Exteriur Bloomberg na vul betg daventar president dals Stadis Unids

L’anteriur president da la citad New York, Michael Bloomberg, na cumenza betg la cursa per il presidi dals Stadis Unids. Tenor Bloomberg pudessia sia candidatura avair la consequenza, che Donald Trump u Ted Cruz vegnissan elegids da las republicanas. Quai na veglia el betg ristgar.

«Sche jau guard las datas, lura èsi cler che jau na pos betg gudagnar.» Cun quests pleds ha Michael Bloomberg argumentà ses na ad ina candidatura per il presidi dals Stadis Unids. Bloomberg è stà president da la citad da New York dal 2002 fin il 2013. Avant curt aveva Bloomberg anc ditg ch’el pondereschia da far part a la cursa. Il milliardari da 74 onns era pli baud democrat, suenter republican. Dapi il 2007 è el senza partida.

Betg auzar schanzas per Trump u Cruz

Sia candidatura auzass las schanzas d’elecziun per Donald Trump u Ted Cruz dals republicans, ha declerà Bloomberg. Quai na veglia el betg ristgar. Trump mainia numnadamain ina campagna «sfendenta e provocanta». Cruz s’exprimia bain pli reservà, dentant sajan sias vistas exactamain uschè extremas sco quellas da Trump, uschia Bloomberg.

Er cunter Sanders

Da curt aveva Bloomberg exprimì ses quitads che Bernie Sanders pudessia gudagnar cunter Hillary Clinton da las democratas. Tenor l’avis da Bloomberg represchenta Sanders posiziuns memia extremas.

Bloomberg aveva gia pli baud ponderà da candidar sco president, dentant adina desistì. Fin qua n’è anc nagin candidat independent daventa president dals Stadis Unids.

RR novitads 06:00

SRF/sda/alb

Artitgels legì il pli savens

Nach links scrollen Nach rechts scrollen