Siglir tar il cuntegn

Header

cuntegn

Boeing 737 MAX Rapport fa responsabel Boeing per crudada en Indonesia

Ch'in aviun dal Tip Boeing 737 MAX è crudà giu avant stgars in onn en l'Indonesia è la culpa dal constructur. A questa conclusiun vegnan las autoritads d'investigaziun. Boeing haja infurmà nunsuffizientamain davart ils problems dal sistem da manevrar.

Tut las 189 persunas a bord eran mortas cura che l'aviun è crudà giu ils 29 d'october 2018 tar il start a Jakarta. Il rapport è vegnì preschentà l'emprim als parents da las unfrendas. Ils proxims dis duai el vegnir preschentà a la publicitad.

Sistem da manevrar è stà problem

En il rapport vai en emprima lingia per in program da manevrar «Maneuvering Characteristics Augmentation System (MCAS)», ch'è vegnì sviluppà da Boeing sez per ils aviuns 737 MAX. Ils pilots pon deactivar il sistem cun dus nuvs en il cockpit. Quai n'è dentant betg capità. Sco para ha in sensur mussà faussas datas. Ils pilots hajan adina puspè empruvà da trair ensi l'aviun, quai che n'ha betg funcziunà.

Il sistem saja stà dependent da sulet in sensur quai che haja chaschunà ch'il privel per sbagls creschia, stat en il rapport.

Perdita da milliardas

Il scumond mundial da sgular per ils aviuns da Boeing 737 MAX ha chaschunà en il segund quartal in minus enorm per la fatschenta. Pervi da reservas da stgars 5 milliardas dollars che Boeing ha stuì far, han els ina perdita netta da 2,9 milliardas en il segund quartal.

Ord l'archiv da SRF

Video
Grounding per la Boeing 737 MAX (Tagesschau)
Or da Tagesschau dals 12.03.2019.
laschar ir

RR novitads 15:00