Siglir tar il cuntegn

Exteriur Boko Haram sustegna ideologia da SI

La gruppa da terror nigeriana Boko Haram ha declerà sia fidaivladad a la milissa terroristica Stadi islamic. Boko Haram haja publitgà in video en l'internet cun in messadi da ses schef Abubakar Shekau.

Dus commembers en vestgadira dal militar sin in plaz tschuf. Davos è ina chasa e trais persunas.
Legenda: Tar in’attatga sin in plaz da fiera a Maiduguri èn mort 10 persunas. Keystone

La gruppa veglia far per cumond al calif en buns ed en nauschs temps. Cun calif è manegià il manader da la gruppa terroristica Stadi islamic Abu Bakr al-Baghdadi.

Ideologia

Boko Haram attatga adina puspè il nord da la Nigeria cun la finamira da fundar là in califat. Stgavazzadas, execuziuns en massa e metter en sclavitid mattatschas s’auda tar il program da propaganda.

50 morts

En il nordost da la Nigeria han da quai da 58 persunas pers la vita, 139 persunas èn vegnidas blessadas suenter 3 attatgas terroristicas. Quai tenor indicaziuns da la polizia. Las attatgas èn stadas sonda. Las autoritads fan responsabel la gruppa da terror Boko Haram per las attatgas da suicidi. Duas attatgas èn succedidas sin fieras localas da peschs, in'attatga sin ina staziun d'autocars.

Privel per dretgs umans

L’organisaziun per dretgs umans Amnesty International è dal maini ch’il pli grond privel per ils dretgs umans na derivia betg mo dal uschenumnà Stadi islamic mabain era da la Boko Haram.

RR novitads 11:00