Siglir tar il cuntegn

Header

Video
Annunzià elecziuns novas, silsuenter demissiunà
Or da Tagesschau dals 10.11.2019.
laschar ir
cuntegn

Bolivia Vacum da pussanza suenter demissiun da Morales

Suenter ch’il president Evo Morales ha demissiunà surprendentamain, datti in vacum da pussanza en la Bolivia.

Igl n’è betg cler tgi che duai manar il pajais sidamerican enfin las novas elecziuns. L’armada ha dementì da vulair surpigliar la pussanza cun in putsch. Quai malgrà ch'il commando da l'armada e la polizia aveva pretendì che Morales sa retira. A l'emprim president indigen dal pajais vegn renfatschà d'avair manipulà las elecziuns.

Preistorgia

Personen-Box aufklappenPersonen-Box zuklappen

Juan Evo Morales Ayma è vegnì elegì il 2006 tar elecziuns anticipadas cun 54% da las vuschs sco emprim indigen en il post da president dal pajais sidamerican.

Il 2009 e 2014 era Morales vegnì reelegì duas ulteriuras giadas cun ina maioritad da 64% e 61% da las vuschs. Il 2016 aveva Morales fatg naufragi cun ina votaziun davart ina midada da la constituziun. La constituziun dal pajais prevesa sulettamain duas periodas en uffizi.

Morales ha entant candidà ina terza respectivamain quarta giada quest onn per il post sco president. La pli auta dretgira dal pajais aveva dà raschun ad el tar sia candidatura – ina exclusiun da sia persuna avess tenor la dretgira cuntrafatg als dretgs umans.

Ils 20 d'october aveva Morales candidà per ina quarta perioda en uffizi. Suenter che 80% da las vuschs eran dumbradas or mussava tut en direcziun elecziun decisiva tranter Morales e ses concurrent Carlos Mesa. Sin a quai è la procedura da dumbrar vuschs vegnida franada per 24 uras.Pir il proxim di è vegnì preschentà resultats. Tenor quests resultats avess Morales survegnì 47,1% da las vuschs, Mesa 36,5% da las vuschs.

En consequenza n'hai dà nagina elecziun decisiva, cun quai che Morales ha survegnì 10% dapli vuschs che Mesa. Quai tanscha tenor la constituziun boliviana per ina elecziun. L'opposiziun discutà da manipulaziun.

La violenza n'è betg a la fin

En vista a grondas demonstraziuns aveva Morales annunzià elecziuns novas. Cunzunt en la chapitala da l'opposiziun Santa Cruz eran las demonstraziuns per part escaladas. Tar charplinas tranter aderents ed adversaris da la regenza eran pliras persunas vegnidas blessadas, almain duas persunas èn mortas. Suenter la demissiun da Morales è la violenza uss danovamain escalada en la chapitala La Paz ed ulteriuras citads.

La chapitala La Paz
Legenda: En la chapitala La Paz è la violenza escalada suenter la demissiun da Morales. Aderents da Morales discurran dat in culp da stadi entras il militar. RTR, Samuel Sossai

Nua che Morales sa chatta actualmain, n’è betg enconuschent. Mexico ha gia annunzià ch'ins veglia porscher a Morales asil en cas, ch'el vegnia tschertgà cun cumond d'arrest. Differents pajais da l'America Latina han crititgà l'agir dal militar. Tranter quels pajais er ils presidents dals stadis socialistics Cuba e Venezuela sco er il nov president da l'Argentina Alberto Fernández. Ses pajais stoppia condemnar mintga emprova da putsch.

Il minister da l'exteriur da la regenza dretga da la Brasilia, Ernesto Araújo, ha percunter ditg ch'i na dettia nagin culp da stadi. Morales haja pers sia legitimitad entras l'emprova da manipular las elecziuns.

RR novitads 15:00