Siglir tar il cuntegn

Header

video
Aderents da Bolsonara assaglian congress.
Or da News-Clip dals 08.01.2023.
laschar ir. Durada: 45 Secundas.
cuntegn

Brasilia Aderentas ed aderents da Bolsonaro han assaglì il congress

Aderents ed aderentas da l'anteriur president brasilian, Jair Bolsonaro han assaglì il congress e l'edifizi dal Tribunal suprem en la chapitala Brasilia. Els han tranter auter sfratgà fanestras ed èn entrads en suler, rapportan medias.

I sa tractia da radund 3'000 persunas en omadus edifizis. La Polizia ha reagì ed gia arrestà radund 260 persunas, ils edifizis èn puspè sut controlla. Pertutgà eran il congress nua ch'il parlament sa radunà, il sez da la regenza ed il tribunal suprem.

Avant eran gia plirs tschient demonstrants avanzads sin l'areal dal parlament ed i sin il tetg da l'edifizi. La polizia ha duvrà spray cun paiver e granatas tschorventantas.

Il president dal senat, Rodrigo Pacheco ha scrit sin Twitter ch'el condemneschia ils acts antidemocratics.

Il president brasilian Luiz Inacio Lula da Silva è il mument en il stadi da Sao Paolo. Il politicher da la sanestra è vegnì saramentà avant in'emna. Ses antecessur Jair Bolsonaro, ch'è a dretga, n'ha betg renconuschì uffizialmain sia sconfitta electorala l'october da l'onn passà.

RTR novitads 21:00

Artitgels legids il pli savens

Scrollar a sanestra Scrollar a dretga